Novel

اب مارل بولے گا اسے نہیں یاد کہ اس کے ماں باپ نے اس کا نام کیا رکھا تھا۔ جب اس نے ہوش سنبھالا خود کو غلاموں کے گروہ میں دیکھا۔ وہ اتنا جانتا تھا کہ وہ سندھ میں ہے۔ مگر اسے یہ نہیں پتا تھا کہ وہ سندھ سے ہے یا نہیں۔ کیا اسے کہیں سے ہونا تھا؟ کیا غلاموں کا کوئی وطن ہوتا ہے؟کوئی اسے مور بلاتا، کوئی مورو اور کوئی مارل۔ اس نے کبھی جاننے کی کوشش نہیں کی کہ ان ناموں کے مطلب کیا تھے۔بس اتنا کافی تھا کہ اسے پتا تھا کہ کس لفظ پہ اسے جان لینا ہے کہ یہ حکم اس کے لیے تھا۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔آفس میں داخل ہوتے ہی بائیں طرف پہلا کمرہ فرزانہ کا آفس تھا۔ فرزانہ اندر کی جانب مڑی تو نور علی نے اس کی طرف الوداعی مسکراہٹ سے دیکھا اور آگے اپنے کمرے کی طرف بڑھ گیا۔فرزانہ اپنے کمرے کے دروازے پہ ہی ایک بازو چوکھٹ پہ ٹکا کے اسے جاتا دیکھ رہی تھی۔محبت سے نہیں۔۔۔۔ پر سوچ انداز میں۔ نور علی اپنے کمرے میں داخل ہونے لگا تو اسے اندازہ ہوا کہ فرزانہ ابھی تک دروازے پہ ہی کھڑی تھی اس نے مبہم سے سوالیہ انداز میں دیکھا اور فرزانہ اتنے ہی مبہم انداز میں انکاری انداز میں سر ہلا کے کمرے میں مڑ گئی۔ ان کی ذہنی ہم آہنگی اتنی ہی مضبوط تھی کہ دونوں ایک دوسرے کی نظروں کے مطلب بھی سمجھ جاتے تھے۔ اس کے باوجود فرزانہ، نور علی کی شخصیت کے کچھ پہلو نہیں سمجھ پارہی تھی۔ ممکن ہے نور علی بھی ایسی ہی کیفیات سے گزرتا ہو۔ لیکن دونوں نے کبھی اس پہ بات نہیں کی۔ فرزانہ بات کرنا چاہتی تھی لیکن اسے وہ الفاظ نہیں مل پارہے تھے جن کی مدد سے وہ اپنے احساسات واضح کرسکے اور نور علی کو یہ احساس نہ ہوکہ فرزانہ اسے کسی قسم کی عدالت میں جوابدہی کے لیے کھڑا کر رہی ہے۔اس نے ڈیڑھ سال کے عرصے میں یہ اچھی طرح جان لیا تھا کہ نور علی حساس طبیعت شخص ہے لیکن اس کے باوجود سیاسی اور معاشرتی مسائل پہ بات کرتے ہوئے چڑ جاتا تھا۔ یا شاید صرف تب چڑتا تھا جب بات میں حوالے کے طور پہ اس کے گاؤں کا تذکرہ نکل آتا تھا۔فرزانہ نے اس بات پہ پہلے اتنا غور نہیں کیا تھا لیکن پچھلے دو ماہ سے اس نے ان معاملات کو الگ انداز میں دیکھنا شروع کیا تھا جب نور علی نے اس سے شادی کی خواہش ظاہر کی تھی۔ آج بھی وہ اسی حوالے سے سوچ رہی تھی۔ وہ ذہنی طور پہ بالکل تیار رہنا چاہتی تھی کہ اگر وہ نور علی سے شادی کرتی ہے تو اسے اس کے گاؤں میں کس قسم کے ماحول کاسامنا ہوگا۔دیکھا جائے تو فرزانہ کی گاؤں کے ماحول تک رسائی کا ذریعہ صرف اخبار اور خبریں تھیں۔ اور یہ کوئی مثبت تصویر پیش نہیں کرتے تھے۔ اسی لیے وہ اب بات بات میں نور علی سے اس کے گاؤں کی بات کرنے لگی تھی تاکہ جان سکے۔ یا شاید اس لیے تاکہ اپنی “غلط فہمی” دور کر سکے جو غلط فہمی تھی بھی یا نہیں اسے بالکل اندازہ نہیں تھا۔کم و بیش یہی پریشانی اس کے گھر والوں کو بھی تھی جس کی بنیاد پہ ابھی تک کوئی واضح فیصلہ ہوتا نظر نہیں آرہا تھا۔بلکہ اصل میں مسئلہ شروع ہی تب ہوا تھا جب اس نے گھر پہ بتایا۔ ابو اور امی دونوں کے الگ الگ تحفظات تھے۔ ابو کو فکر تھی کہ رشتے دار اعتراض کریں گے۔ ہم زبان ہوتا تو چلو کوئی جان پہچان کا بہانہ نکالا جاسکتا تھا۔ مگر یہاں تو زبان بھی الگ ذات بھی الگ، سندھی وہ بھی گاؤں کا۔ اور فرزانہ کا خاندان وہ تھا کہ جب دو بزرگ مل بیٹھیں اور ہندوستان سے ہجرت کا واقعہ نہ نکلے یہ ممکن ہی نہیں تھا۔ یہ الگ بات تھی کہ اب شاید گن کے دو یا چار ہی ایسے بزرگ رہ گئے تھے جنہوں نے بچپن میں بٹوارہ ہوتے دیکھا تھا۔ فرزانہ کے اپنے والدین پچاس کی دہائی میں ہی پیدا ہوئے تھے۔ اور وہ اپنے والدین کی سب سے بڑی اولاد تھی۔ انہوں نے بھی ہندوستان سے آنے کے بس قصے ہی سنے تھے۔ ہاں لیکن مہاجر ہونے کا فخر ضرور نسل در نسل منتقل ہورہا تھا۔ اس بات کا فخر کہ ملک کی بنیادوں میں جو خون ہے وہ ہمارے ہی آباؤاجداد کا تھا۔ اس بات کا فخر کہ قومی زبان ہماری مادری زبان ہے۔ ابو نے شہر میں ہونے والے سندھی مہاجر جھگڑے بہت قریب سے دیکھے تھے کالج میں جن دوستوں کے ساتھ کینٹین میں گپیں لگاتے تھے انہی سے پٹے بھی تھے۔ اور موقع ملنے پہ پیٹا بھی تھا۔اب وہ جھگڑے تو نہیں تھے۔ دوبارہ سندھی دوست بھی بنے، آفس کے ساتھیوں میں بھی سندھی تھے۔ پڑوس میں بھی کئی گھر اب سندھی خاندانوں کے تھے لیکن بیٹی ایسے گھر میں دیتے ہوئے لگتا تھا جیسے ساری قوم ان پہ انگلی اٹھائے کھڑی ہے “تم ہو جو سندھو دیش بنانے والوں کی افرادی قوت بڑھا رہے ہو، تم ہو جو ملک میں ڈیم بننے سے روکنے والوں کو رشتے دار بنا رہے ہو۔ اب تم کیسے کہو گے کہ تمہارا تو فلاں زندہ ہے اسی لیے ترقی نہیں کر پارہے۔ اب تمہاری بیٹی کے حجلہء عروسی میں بی بی کی تصویر لگی ہوگی۔” امی کو ڈر تھا کہ فرزانہ، نور علی سے پسند کی شادی کرے گی تو نور علی کے گھر والے کاری کرنے نہ آجائیں۔ ان کی دوسری بڑی پریشانی یہ تھی کہ وہ شادی کرکے گاؤں چلی بھی گئی تو لیٹرین باتھ روم کا کیا کرے گی۔ بندہ کھلے عام لکڑیوں پہ کھانا پکا سکتا ہے۔ لیکن۔۔۔۔۔۔۔۔۔۔فرزانہ کے لیے یہ تمام اعتراض بالکل غیر منطقی تھے اس کے لیے تو گاؤں کے مسائل باعث فکر ہی اس لیے تھے کیوں کہ اسے لگتا تھا کہ اسے جتنی انسیت اپنے شہر سے ہے اتنی ہی انسیت گاؤں سے بھی ہے وہی اپنائیت کہ وہ مختلف سہی مگر اپنا ہے۔گھر پہ وقتاً فوقتاً شروع ہو جانے والی بحثوں کا اثر یہ ہوا کہ اب تقریباً روز ہی اس کی

!اب مارُل بولے گا ابصار فاطمہ قسط نمبر 1 او مارل بچڑا! ادھر آ۔۔۔ حاکم سائیں کے وسیع دربار میں جھاڑو دیتے مارل کے ہاتھ کچھ لمحے کو رکے اور اس کے معصوم چہرے پہ خوف کا سایہ لہرایا۔ حاکم سائیں نے دوبارہ اسے دربار سے ملحقہ حجرے میں بلایا تھا۔ وہ تاریک حجرہ جس کی تاریکی شاید صرف مارل کو نظر آتی تھی۔ ہر دفعہ وہ تاریکی گہری ہوتی جارہی تھی اور ساتھ ہی مارل کی چپ بھی۔ وہ غلام تھا اور اس حاکم سائیں کا ہر حکم بجا لانا اس کا فرض۔ ————- “یہ تمہارے علاقے کے ابو کبھی کچھ نہیں کریں گے تم لوگ پتا نہیں کیوں جانتے بوجھتے بھی ہر بار اسی شخص کو ووٹ دیتے ہو۔ مجھے تو لگتا ہے تم لوگ خود بھی حالات نہیں بدلنا چاہتے۔” اس کی نظریں اپنی پیالی پہ تھیں جس میں پڑے دو ٹی بیگز کو وہ ہر ممکن حد تک کھولتے پانی میں گھول دینا چاہتی تھی۔ یا شاید اس کی نظریں ٹی بیگز پہ ضرور تھیں مگر دماغ کا محور اپنی بات تھی اسی لیے بات ختم ہوتے ہی اس نے ٹی بیگز کو چمچ پہ رکھ کر آخری بار نچوڑا اور چمچ سمیت بسکٹ کی پلیٹ میں رکھ دیا۔ “فیری یار, تم اتنی کڑوی چائے کیسے پی لیتی ہو؟”“نور یار، تم اپنے ہی علاقے کے مسائل سے اتنے لا تعلق کیسے رہ لیتے ہو؟”۔ نور علی چند لمحوں تک اسے بغیر پلکیں جھپکائے دیکھتا رہا۔ پھر جھنجھلاہٹ آمیز انداز میں کندھے جھٹکے۔ اس کے انداز میں فرزانہ کے لیے تو نہیں لیکن اس کی بات کے لیے واضح ناگواری تھی۔ “کچھ بولو گے نہیں؟”” کیا بولوں یار؟ ہمیں ایک گھنٹہ ملتا ہے لنچ کا، جو اکثر پورا بھی نہیں ملتا اور تمہیں اپنی بات کرنے کی بجائے سیاست ہی کیوں یاد آتی ہے؟” اس نے اپنے سامنے رکھی چائے کی پیالی ایک طرف کردی اور میز پہ دونوں کہنیاں رکھ کے تھوڑا آگے جھک کے بیٹھ گیا۔“آج میں ہاف ڈے کر لیتا ہوں۔ تم بھی کرلو واپس اوپر جانے کی بجائے یہیں بیٹھ کے مسئلہ حل کر لیتے ہیں اور میرے گاؤں کو فرانس بنا کے ہی اٹھیں گے۔” اس کی جھنجھلاہٹ آمیز سنجیدگی پہ فرزانہ ایک دم ہنس پڑی۔ “اچھا ناں ناراض کیوں ہورہے ہو۔ تمہیں پتا ہے مجھے یہ مسائل کتنا اسٹریسڈ کردیتے ہیں۔ تم سے بات نہ کروں تو کس سے کروں۔” “مجھے بالکل مزا نہیں آرہا۔۔۔۔ ہنستی رہو جتنا مرضی۔ مطلب تم لوگ ایسے ظاہر کرتے ہو جیسے شہر میں تو کوئی مسائل ہی نہیں ہیں۔ سارے مسئلے گاؤں میں ہیں وہ بھی میرے گاؤں میں۔” ” نہیں ہیں؟” فرزانہ کا سوال سنجیدہ تھا لیکن انداز شرارتی تھا۔“مطلب مسئلے ہیں۔۔۔۔۔ لیکن ایسے نہیں ہیں جیسے پیش کیے جاتے ہیں۔ وہ بھی اسی ملک کا حصہ ہے جہاں کا شرح خواندگی صرف کاغذات میں بڑھ رہا ہے۔ جہاں صرف نام لکھنے والے کو پڑھا لکھا شمار کیا جاتا ہے۔ نہ میرا گاؤں آسمان سے اترا ہے نہ یہ صوبہ۔” اس کے انداز میں کسی حد تک بے بسی نمایاں تھی۔ فرزانہ کو اس پہ ترس آنے لگا۔ ہر بار وہ یہی کوشش کرتی تھی کہ ان کی بات چیت عمومی مسائل تک رہے لیکن کب اور کیسے بات مسائل سے ہوتی ہوئی سیاست اور خاص طور سے نور علی کے گاؤں تک پہنچ جاتی تھی۔ اسے یہ بھی اندازہ تھا کہ یہ بحث ان کے اچھے خاصے تعلق پہ بھی اثر کر رہی ہے۔ بلکہ صرف اچھا خاصا کہنا تو کافی نہیں تھا اچھا خاصا رومانوی تعلق تھا۔ “اچھا چھوڑو تم چائے تو پیو۔” “ٹھنڈی ہوگئی ہے۔” نور علی کا لہجہ کچھ روٹھا ہوا سا تھا۔ ” ارے مائی فیوڈل لارڈ۔۔۔ معاف فرما دیجیے۔”“یار فیوڈل مت کہا کرو!”” تو نہیں ہو کیا؟” ” بیٹا ہوتا نہ اصلی والا فیوڈل یہاں آفس میں جوتے اور دماغ نہیں گھس رہا ہوتا۔ نہ تمہاری جیسی خود مختار لڑکی سے محبت کی پینگیں بڑھا رہا ہوتا۔” اس نے کہتے ہوئے موبائل اسکرین آن کرکے وقت دیکھا اور میز سے کھڑا ہوگیا۔ ” خود مختار عورت” فرزانہ نے بیچ میں سے بات اچک کر تصحیح کی۔ وہ بھی ساتھ ہی کھڑی ہوگئی تھی۔” بتیس سال کی عورت نہیں ہوتی۔” دونوں کینٹین سے باہر کی طرف بڑھ چکے تھے۔” بتیس سال کی ‘مطلقہ’،۔۔۔ عورت ہی ہوتی ہے۔” اس نے مطلقہ پہ تھوڑا زور دیا۔ کینٹین سے باہر اکا دکا لوگ بر آمدے میں آتے جاتے دکھائی دئیے۔ “اب اس پہ لڑ لو۔” وہ دونوں بات کرتے کرتے لفٹ نظر انداز کرکے زینے کی طرف بڑھ گئے۔ “ارے لڑ نہیں رہی۔ بس ایسے ہی کہہ رہی تھی۔ تمہارے مجھے لڑکی کہہ دینے سے تمہارے اور میرے درمیان موجود عمر کا فرق ختم نہیں ہوجائے گا۔” زینے پہ پہلا موڑ مڑتے ہوئے دونوں کے ہاتھ مبہم سے ٹکرائے۔ نور علی نے غیر محسوس انداز میں فرزانہ کا ہاتھ تھام لیا۔ وہ اس کی طرف دیکھے بغیر بھی بتا سکتا تھا کہ وہ مسکرا رہی ہے۔ صرف لبوں سے نہیں آنکھوں سے بھی۔ ” محترمہ آپ نے ڈگری پڑھ کے لی تھی یا نقل کی تھی۔” “نقل کی تھی۔” اس کے شرارتی طنزیہ لہجے کو وہ بھی اچھی طرح پہچانتی تھی۔ ” اسی لیے۔۔۔” نور علی کے لہجے میں مصنوعی افسوس تھا۔ ” پڑھ کے ڈگری لی ہوتی تو کم از کم یہ لڑکی بڑی نہیں ہونی چاہیے والی غلط فہمی تو نہ ہوتی۔ دو سال کے فرق سے ویسے بھی آپ ضعیفہ نہیں ہوگئیں۔ میرے کام آہی جائیں گی۔” زینے کی تنہائی نے اس کا انداز اور لہجہ بدل دیا تھا۔ بے ساختہ فرزانہ کی مسکراہٹ گہری ہوگئی” یہ ڈبل میننگ جوک بالکل مت کیا کرو میرے ساتھ۔” اس کے لہجے میں بھی مصنوعی ناراضگی تھی۔“سوری خاتون میں رن مرد ہونے کے ساتھ ساتھ ایک بچی کا باپ ہوں اس لیے ذومعنی والے سے کام چلائیں یک معنی والے واضح لطائف برائے بالغین کی توقع مجھ سے ہرگز مت کریں۔” ” رن مرید ہوتا ہے۔” ” وہ اردو میں ہوتا ہے۔ رن مرد مطلب بیوہ مرد۔” ” توبہ۔۔۔۔ تو رنڈوا کہو ناں” “ارے تو سمجھ گئیں ناں کافی ہے۔” آفس کا دروازہ سامنے آتے ہی فرزانہ نے آہستگی سے ہاتھ