انسانی تہذیب کی ترقی کا اندازہ اس بات سے کیا جا سکتا ہے کہ وہ اپنے کمزور اور اقلیتی طبقات کے ساتھ کس حد تک انصاف اور احترام کا برتاؤ رکھتی ہے۔ ہمارا معاشرہ اس وقت تین ایسے گروہوں کے بنیادی حقوق اور ہمارے معاشرے میں انکی شمولیت کے حوالے سے سنگین مسائل کا سامنا کر رہا ہے: خواتین ، معذور افراد  اور خواجہ سرا   برادری۔ یہ تینوں گروہ تاریخی، ثقافتی اور ساختی غیر امتیازی کا شکار  ہیں۔ ان کے مسائل محض انفرادی نہیں بلکہ سماجی، معاشی اور قانونی   ہیں۔

صنفی بنیاد پر امتیاز ہمارے معاشرے کا ایک پرانا مسئلہ ہے۔ اگرچہ خواتین نے ہر میدان میں اپنی صلاحیتوں کا لوہا منوایا ہے، لیکن سماجی ناروا رویے اور اداروں میں حقوق سے محرومی  اب بھی مساوات کے حصول میں رکاوٹ ہیں۔دیہات اور پسماندہ علاقوں میں لڑکیوں کو تعلیم کے یکساں  اور بہترین مواقع میسر نہیں ہیں۔ پرائمری سطح کے بعد لڑکیوں کی تعلیم حاصل نا کرنے کی  شرح بہت زیادہ ہے جس کی وجہ سہولیات کا فقدان، غیر محفوظ ما حول اور رسم و رواج ہیں۔ملازمت کے مواقع موجود ہیں مگر ان  میں صنفی تفریق، کام کے یکساں معاوضے کا نہ ہونا، اور غیر رسمی شعبے میں استحصال ،خواتین کی معاشی خودمختاری میں رکاوٹ ہیں۔ گھریلو تشدد، جنسی ہراساں کرنا، غیرت کے نام پر قتل، تیزاب پھینکنے جیسے واقعات نہ صرف جرائم ہیں بلکہ سماجی  غیر اخلاقی ذہنیت کے عکاس بھی ہیں۔ اکثر  اوقات  خواتین انصاف کے حصول سے محروم رہ جاتی ہیں۔  عورت اس بات پر کتنا ہی اصرار کر لے کہ
                                                                                                                                                                                                                                                                                                                                                                                                                                                                                                                                                                                                                                                                                                                                                                             ؎                                                                            زمانے!    اب تیرے مدِمقابل                                                                                  کوئی کمزور سی عورت  نہیں ہے                                                   (فریحہ نقوی)                                                                                                                                                                               

مرد کسی نا کسی اسٹیج پر چاہے وہ معاشرتی ہو یا معاشی ہو، اس کے حصول سلب کرنے سے باز نہیں آتے۔ وہ ساحر لدھیانوی کا کیا خوب شعر ہے۔

                                                                                                                                                                                                                                                                                                                                                                                                                                                                          ؎                                                                                                   عورت نے جنم دیا مردوں کو مردوں نے اسے بازار دیا                                                                                                                                           جب جی چاہا مسلا کچلا جب جی چاہا دھتکار دیا

قانون کے اداروں میں خواتین کی نمائندگی ناکافی ہے۔ اگرچہ کوٹہ سسٹم موجود ہے، لیکن  اختیار اور تعلقات کی سطح پر خواتین کی شرکت محدود ہے۔

ان مسائل کی جڑیں دقیانوسی تصورات اور قانونی نظام کی کمزور عملداری سے وابستہ ہیں۔

معذور افراد ہمارے معاشرے کا وہ طبقہ ہے جو اکثر نظروں سے اوجھل رہتا ہے۔ ان کے مسائل صرف طبی یا جسمانی نہیں، بلکہ زیادہ تر سماجی ہیں۔ ہمارے عوامی مقامات، عمارتیں، نقل و حمل کے نظام، تعلیمی ادارے اور تفریحی مراکز اکثر معذور افراد کی ضروریات کے مطابق ڈھلے ہوئے ہی نہیں ہیں۔ معذور بچوں کے لیے خصوصی تعلیمی ادارے  بہت محدود ہیں اور ان کا معیار تسلی بخش نہیں ہے۔ روزگار کے میدان میں غیر امتیازی سلوک اور منفی رویے انہیں معاشی طور پر متاثر کرتے ہیں۔ معذوری کو اکثر  شرم کا باعث  سمجھا جاتا ہے، جس کی وجہ سےمعذور افراد کو سماجی تقریبات سے الگ تھلگ رکھا جاتا ہے۔ یہ غلط رویہ ان کی نفسیاتی صحت پر شدید منفی اثر ڈالتا ہے۔ معذور افراد کے حقوق سے متعلق قوانین موجود ہیں، لیکن ان کا نفاذ نہ ہونے کے برابر ہے۔

“معاشرہ معذوری کو فرد کا مسئلہ سمجھتا ہے، حالانکہ یہ دراصل معاشرے کا مسئلہ ہے ۔”

خواجہ سرا   برادری شاید ہمارے معاشرے کا سب سے زیادہ پسا  اور  ستایا ہوا طبقہ ہے۔ ان کا مسئلہ محض صنفی شناخت کا نہیں، بلکہ بنیادی انسانی حقوق سے محرومی کا ہے۔ خاندان اور معاشرے کی طرف سے ابتدا ہی سے انہیں قبول نہیں کیا جاتا جوکے بےحددکھ کا سبب ہے۔ گھر سے نکالے جانے کے بعد ان کے پاس سر چھپانے کے لیے چھت اور معاش کے لیے کوئی ذریعہ نہیں ہوتا۔ تعلیم اور روزگار کے تمام دروازے ان پر بند ہیں، جس کی وجہ سے ان کے پاس معاش کے محدود ذرائع رہ جاتے ہیں۔ مجبوراً بھیک مانگنے، ناچ گانے یا جسم فروشی جیسے پیشے اپنانے پڑتے ہے۔وہ پولیس اور عام شہریوں کی جانب سے جسمانی و جنسی تشدد کا آسان ہدف بنتے ہیں لیکن  اب حکومتِ پاکستان نے ان کے لئے تعلیمی اور شناختی اقدامات اٹھائے ہیں۔

ستمبر 2025 میں صوابی میں ایک مقامی کمیٹی نے خواجہ سرا افراد سے ضلع چھوڑنے کا مطالبہ کیا جس کی  ہیومن رائٹس کمیشن آف پاکستان نےسخت مذمت کی۔ اس کمیٹی نے کہا کہ خواجہ سرا لوگوں کی موجودگی معاشرتی اقدار کو متاثر کر رہی ہے، جبکہ خواجہ سرا افراد نے واضح کیا کہ وہ آئینی حقوق کے طلبگار ہیں اور قانون کے تحت رہنے کا حق رکھتے ہیں۔  ہیومن رائٹس کمیشن آف پاکستان نے کہا کہ کسی بھی شہری کو صرف جنس کی بنیاد پر رہنے یا روزگار کمانے سے محروم نہیں کیا جا سکتا،  اور اس طرح کے مطالبے غیرامتیازی سلوک کی نمائندہ ہیں۔

                                                                                                                                                                                           ؎                                                                                                                                                             گالوں پر غازے کے پیچھے درد کے سوکھے پھول                                                                                                                                      لچکیلی بانہوں کی شاخوں پر نفرت کی دھول  

                                                                                                                                                                                                                                                                                                                                               کالی کالی قسمت ان کی نیلے پیلے خواب                                                                                                                                                                                                                                                                                                                           اتنے رنگوں میں اپنی پہچان بھی ایک عذاب            

 (الیاس بابر اعوان)                                                                                                                                                                                                                                                                                                                                                                            

طبی مراکز پر غیر امتیازی سلوک کا سامنا ہوتا ہے۔انڈیپنڈنت اردو کے مطابق ا کتوبر 2025 میں پاکستان میں خواجہ سرا افراد کو جنسی ہم آہنگی کی محفوظ سرجری حاصل کرنے میں شدید مشکلات اور سماجی مزاحمت کا سامنا ہوا، اگرچہ قانون کے مطابق انہیں یہ حق حاصل ہے۔کالم میں لکھا  ہے کہ پاکستان میں، جہاں حال ہی میں صنفی ہم آہنگی کی سرجری  کو قانونی حیثیت دی گئی ہے، بنٹی ان چند ٹرانس خواتین میں شامل ہیں، جو یہ عمل محفوظ طریقے سے کروانے کی استطاعت رکھتی تھیں۔بنٹی نے بتایا کہ وہ لاہور کی واحد خاتون ڈاکٹر کے پاس گئیں، جو ٹرانس خواتین کے لیے چھاتی بڑھانے کی سرجری کرتی ہیں۔ اگرچہ یہ عمل کامیاب رہا، لیکن بنٹی کے بقول یہ ایک “خفیہ”  طریقے سے انجام دیا گیا اور اس کی لاگت عام خواتین کی نسبت دُگنی تھی۔انہوں نے اے ایف پی کو بتایا: “مجھے صرف دو گھنٹے کے لیے ہسپتال میں رکھا گیا، اس کے بعد مجھے زبردستی باہر بھیج دیا گیا تاکہ کسی کو علم نہ ہو سکے۔”انہوں نے بتایا: “میں شدید تکلیف میں تھی۔”

ان تینوں مختلف گروہوں کے مسائل میں واضح مماثلتیں ہیں۔ ہر گروہ سماجی غیر امتیازی رویے، طنز اور اخراج کا شکار ہے۔ ان کے لیے تعلیم اور عزت کے ساتھ روزگار کے ذرائع محدود ہیں۔یہ تمام گروہ اپنی کمزور سماجی پوزیشنزکی وجہ سے تشدد اور استحصال کا شکار ہوتے ہیں۔قوانین چاہے کتنے ہی بنا لیے جائیں ، روایتی سماجی رویے ان کے مؤثر نفاذ میں رکاوٹ ہیں۔ اس لیے جو  پالیسیاں اور حل نکالے جا رہے وہ جامع، ہمہ گیر اور باہم مربوط ہونے چاہئیں۔

اسکولوں کے نصاب میں انسانی حقوق، صنفی مساوات، معذوری کی حساسیت، خواجہ سرا   برادری کے احترام کے بارے میں تعلیم شامل کی جائے۔ اس سب میں میڈیا کو مثبت کردار ادا کرنا چاہیے۔  خواتین، معذور افراد  اور خواجہ سرا   برادری کے حقوق سے متعلق موجودہ قوانین کا موثر نفاذ یقینی بنایا جائے۔   خصوصی عدالتوں کا قیام عمل میں لایا جائے تاکہ ان گروہوں کے خلاف کیسزکی بروقت سماعت ہو سکے۔ کاروباری قرضوں کے حصول کے لیے مہم چلائی جائے۔ سرکاری اور نجی شعبوں میں ان تمام گروہوں کے لیے ملازمت کے کوٹے مقرر کیے جائیں۔  خواتین اور معذور افراد کے لیے ہمیں بیشتر جگہوں پر کوٹے دیکھنے کو ملتے ہیں مگر خواجہ سرا افراد کے لیے نہیں۔ تمام عوامی مقامات، نقل و حمل اور ڈیجیٹل پلیٹ فارمز کو معذور افراد کے لیے قابل رسائی بنایا  جائے۔ خواجہ سرا   برادری کی سماجی، ثقافتی اور مذہبی تقریبات میں شرکت کو فروغ دے کر انہیں معاشرے کا حصہ بنایا جائے۔ خواتین کے لیے محفوظ عوامی مقامات اور نقل و حمل کے نظام یقینی بنائے جائیں۔  نوجوان اس تبدیلی کے لیے اہم کردار ادا کر سکتے  ہیں۔ وہ سوشل میڈیا کے ذریعے آگاہی پھیلا سکتے ہیں اور اپنے گھروں اور حلقہ احباب میں مثبت رویوں کو فروغ دے سکتے ہیں۔

صنف، معذوری اورخواجہ سرا   برادری کے مسائل دراصل ہمارے معاشرے کے اخلاقی امتحانات ہیں۔ یہ ہمارے انصاف، ہمدردی اور انسانی وقار کے تصورات کی پیمائش کرتے ہیں۔ کسی بھی معاشرے کی ترقی اس وقت تک نامکمل ہے جب تک اس کے تمام افراد کو ان کی بنیادی انسانی حیثیت میں حقوق، احترام اور ترقی کے یکساں مواقع حاصل نہ ہوں۔

اس سفر کا آغاز اس بات کو تسلیم کرنے سے ہوتا ہے کہ مسائل موجود ہے۔ پھر  یہ سمجھنے سے  کہ ان گروہوں کے جذبات، تکالیف اور امیدوں کو سمجھناہے اور کیسے سمجھنا ہے اور آخر میں عمل سے اپنی حد تک  کوشش کرنی چا ہیے اب چاہے وہ کتنی ہی چھوٹی کوشش کیوں نہ ہو۔  پاکستانی معاشرہ ایسا ہونا چاہیے  جہاں ایک لڑکی بے خوف ہو کر باہر نکل سکے، ایک معذور نوجوان بغیر  کسی رکاوٹ کے یونیورسٹی جا سکے، اور ایک خواجہ سرا   عزت اور امید کے ساتھ اپنے گھر اور معاشرے میں جگہ کا حصول ممکن بناسکے۔ یہ کوئی خواب نہیں، بلکہ ایک ایسا حق ہے جس کے حصول کے لیے ہم سب کی اجتماعی جدوجہد درکار ہے۔